सिन्धुली, घ्याङ्लेख गाउँपालिका-३ तामाजोर भन्ने स्थानबाट १ थान भरुवा बन्दुक सहित ३ जनालाई बिहीबार राति प्रहरीले पक्राउ गरेको छ । पक्राउ पर्नेहरुमा कमलामाई नगरपालिका-१२ खोक्सिङ बस्ने ३८ वर्षीय नेत्र बहादुर मोक्तान, सोही नगरपालिका-५ रानीखोला बस्ने ५३ वर्षीय तिर्थ बहादुर मगर र नुवाकोट सूर्यगडी गाउँपालिका-१ मनिडाडा बस्ने ३६ वर्षीय कुमार तामाङ रहेका छन् । सोही ठाउँस्थित निर्माणाधीन स्वास्थ्य चौकीको भबनमा काम गर्दै आएका उनीहरुलाई उक्त बन्दुक सहित फेला पारी  ईलाका प्रहरी  कार्यालय बस्तिपुरबाट खटिएको प्रहरीले पक्राउ गरेको हो । 

मकवानपुर, मकवानपुरगढी गाउँपालिका-५ देउराली डाँडा बस्ने ५१ वर्षीय दिल बहादुर गोङ्बालाई १ थान एकनाले भरुबा बन्दुक र १ किलो अवैध लागूऔषध गाँजा सहित बिहीबार साँझ प्रहरीले पक्राउ गरेको छ । उनको घरमा भरुवा बन्दुक र लागूऔषध रहेको भन्ने सूचनाको आधारमा अस्थाई प्रहरी पोष्ट धादिङबाट खटिएको प्रहरीले जाँच गर्ने क्रममा उक्त बन्दुक र गाँजा सहित फेला पारी उनलाई पक्राउ गरेको हो ।

यस सम्बन्धमा प्रहरीले थप अनुसन्धान गरिरहेको छ ।