प्रहरी कन्ट्रोल : १००, टोल फ्री नं.: १६६००१४१५१६
नेपा
EN

प्रहरी महानिरीक्षक दान बहादुर कार्कीको प्रमुख आतिथ्यतामा नेपाल प्रहरी रणनीतिक योजना सार्वजनिकीकरण

२०८३-०२-०५

  • A
  • A-
  • A+
Share

काठमाडौं, प्रहरी महानिरीक्षक दान बहादुर कार्कीको प्रमुख आतिथ्यतामा नेपाल प्रहरी प्रधान कार्यालयमा मंगलबार आयोजित विशेष समारोहबीच नेपाल प्रहरीको रणनीतिक योजना २०८३-०८५ सार्वजनिकीकरण कार्यक्रम सम्पन्न भएको छ ।

समारोहमा प्रहरी महानिरीक्षक कार्कीले नागरिक सहायता तथा गुनासो व्यवस्थापन अनलाइन प्रणालीको शुभारम्भ गर्नुका साथै प्रहरी वरिष्ठ नायव निरीक्षक श्रीहरी केसीद्वारा लिखित ‘मिसन’ नामक पुस्तक विमोचन समेत गर्नुभयो ।

नागरिक केन्द्रित प्रहरी सेवा र प्रविधि मैत्री रूपान्तरणलाई मुख्य प्राथमिकतामा राखेर नेपाल प्रहरीले आगामी तीन वर्षका लागि तयार गरेको रणनीतिक योजना २०८३-०८५ तयार गरेको छ । रणनीतिक विषय (Strategic Theme) “नवप्रवर्तन, इमानदारिता र तत्परता मार्फत प्रहरी सेवाको रूपान्तरण (Transformation of Policing through innovation, integrity & responsiveness)’ तय गरिएको यस रणनीतिक योजनाको कार्यान्वयनको माध्यमबाट नागरिक केन्द्रित प्रहरी सेवा, प्रविधिमैत्री रूपान्तरण, मानव अधिकारप्रति प्रतिबद्धता र उच्च व्यावसायिकता मार्फत नेपाल प्रहरीलाई अझ सक्षम, उत्तरदायी र भरोसायोग्य संस्थाका रूपमा स्थापित गर्ने अपेक्षा गरिएको छ । 

समुदायसँगको साझेदारीलाई मजबुत बनाउँदै प्रविधिको अधिकतम् प्रयोगमार्फत प्रहरी सेवालाई समयसापेक्ष, पारदर्शी र परिणाममुखी बनाउन यस योजनाले जोड दिएको छ । यस रणनीतिक योजनाद्वारा कुल ७ वटा रणनीतिक क्षेत्रहरू अन्तर्गत रहेर ३६ वटा रूपान्तरणकारी रणनीति र ९९ वटा मुख्य कार्यक्रमहरू सम्पन्न गरिनेछ । यस रणनीतिक योजनाको कार्यान्वयनद्वारा नीतिगत र कानुनी सुधार, समुदाय प्रहरी सहकार्य संस्थागत र सुदृढ, समस्या र पुर्वानुमानमा आधारित अपराध रोकथाम र नियन्त्रण प्रणाली, जनशक्तिको सेवा विशिष्टीकृत कार्य विवरण र कार्य सम्पादनमा आधारित वृत्ति विकास, अपराध अनुसन्धान र प्रहरी कार्यका विशिष्टीकरण र आधारभुत क्षमता स्थापना, प्रहरी प्रशासन र सेवा प्रवाहका प्रणालीहरूको कार्यदक्षता र कार्य प्रभावकारितामा सुधार, सुपरिवेक्षण, अनुगमन र मूल्याङ्कनका वैज्ञानिक मापदण्डहरूको विकास र कार्यान्वयन लगायतका लक्ष्यहरू हासिल गर्ने अपेक्षा गरिएको छ । नीति, योजना र अन्तर्राष्ट्रिय समन्वय, शान्ति सुरक्षा, प्रहरी कारबाही र विपद् व्यवस्थापन, अपराध रोकथाम तथा नियन्त्रण, अपराध अनुसन्धान, मानवस्रोत विकास, भौतिक पूर्वाधार, स्रोत साधन तथा सहायता सेवाहरू, सूचना प्रविधि लगायतमा रणनीतिक योजनाका कार्यक्षेत्र रहेको छ ।  

साथै नागरिक सहायता तथा गुनासो व्यवस्थापन अनलाइन प्रणालीको शुभारम्भले नागरिक र प्रहरीबीचको सम्बन्धलाई अझ सुदृढ, सहज र पारदर्शी बनाउन महत्वपूर्ण योगदान पुग्ने एवम् सेवाग्राहीको निवेदन, उजुरी लिएन भन्ने गुनासोको अन्त्य हुने अपेक्षा गरिएको छ । नेपाल प्रहरीमा प्राप्त निवेदन, उजुरी तथा गुनासो व्यवस्थापन प्रक्रियालाई पारदर्शी र उत्तरदायी बनाउँदै सेवाग्राहीमैत्री सेवाहरू डिजिटल माध्यमबाट उपलब्ध गराउनुका साथै प्रहरी कार्यालयहरूबीच सूचना आदानप्रदानलाई एकीकृत गर्ने, तथ्याङ्क विश्लेषण तथा प्रतिवेदन प्रणाली विकास गर्ने एवम् डिजिटल अभिलेख व्यवस्थापनलाई सुरक्षित र व्यवस्थित बनाउनु यस प्रणालीको मुख्य उद्देश्य रहेको छ ।

समारोहलाई सम्बोधन गर्दै प्रहरी महानिरीक्षक कार्कीले योजनाबद्ध विकासको माध्यमबाट नेपाल प्रहरीलाई पेशागत रूपमा उत्कृष्ट, व्यावसायिक, समयसापेक्ष एवम् आमनागरिकको अपेक्षा बमोजिमको सेवा प्रवाह गर्ने सक्षम संस्थाका रूपमा विकास गर्न नेपाल प्रहरी रणनीतिक योजना तयार गरिएको बताउनुभयो । विगतको कार्ययोजनाको प्रमुख उपलब्धिहरू तथा कार्यान्वयन पक्षमा देखिएका मूलभूत समस्याहरूलाई विश्लेषण गरी त्यस्ता समस्याहरूलाई यथोचित सम्बोधन गर्न रणनीतिक योजना तयार गरिएको उल्लेख गर्दै यस योजनालाई मूर्तरूप दिन सम्पूर्ण प्रहरी कर्मचारीहरूको सामुहिक भावना र चाहना जरूरी रहेको उहाँले बताउनुभयो । 

प्रहरी महानिरीक्षक कार्कीले परम्परागत अपराधहरू रूपान्तरण भएर संगठित स्वरूपमा गइरहेको साथै आर्थिक अपराधहरूको संख्यामा समेत वृद्धि भइरहेको अवस्थामा त्यसलाई सम्बोधन गर्न यो रणनीतिक योजना प्रभावकारी हुने उल्लेख गर्दै यसका लागि भौतिक पूर्वाधार तथा मानवस्रोतको विकास, आधुनिक प्रविधिको प्रयोग, प्रहरी कर्मचारीहरूको क्षमता अभिवृद्धि तथा सरोकारवाला निकायहरूको साथ र सहयोगको आवश्यकता रहेको बताउनुभयो । 

सो अवसरमा प्रहरी महानिरीक्षक कार्कीले नागरिक सहायता तथा गुनासो व्यवस्थापन अनलाइन प्रणाली मार्फत सेवाग्राहीहरूलाई प्रहरी सेवामा सरल र सहज पहुँच स्थापित गर्न मद्दत गर्ने विश्वास व्यक्त गर्दै सम्पूर्ण प्रहरी कर्मचारी तथा आमनागरिकहरूलाई नेपाल प्रहरीको ‘मोबाइल एप’ प्रयोग गर्न आग्रह गर्नुभयो । साथै उहाँले प्रहरीको व्यस्त जीवनशैलीमा रहेर समेत साहित्यिक कृति सृजना गर्ने प्रहरी वरिष्ठ नायब निरीक्षक केसीले दुई दशक भन्दा लामो निरन्तर प्रहरी जीवनका आरोह अवरोहहरूलाई समेटी कलात्मक ढंगले सृजना गरेको यात्रा-संस्मरणात्मक कृतिले प्रहरी संगठनभित्र ज्ञान, अनुभव र अध्ययन संस्कृतिको विकासमा थप प्रेरणा प्रदान गर्ने विश्वास व्यक्त गर्नुभयो । 

नेपाल प्रहरीका केन्द्रीय प्रहरी प्रवक्ता प्रहरी नायव महानिरीक्षक अबि नारायण काफ्लेले स्वागत मन्तव्य व्यक्त गर्नुभएको उक्त कार्यक्रममा अन्वेषण योजना तथा विकास निर्देशनालयका प्रमुख प्रहरी नायव महानिरीक्षक राजेन्द्र प्रसाद भट्टले नेपाल प्रहरीको रणनीतिक योजना २०८३-०८५ को पृष्ठभूमि, रणनीतिक योजना तर्जुमाका विधिहरू, नेपाल प्रहरी कार्ययोजना २०८०-०८२ को उपलब्धिहरू, रणनीतिक योजनाका लक्ष्यहरू (अल्पकालीन/दीर्घकालीन), रणनीतिक योजनाका क्षेत्रहरू, रणनीतिक योजनाको कार्यान्वयन, अनुगमन र मूल्याङ्कन लगायतका विषयहरूमा प्रस्तुतीकरण गर्नुभएको थियो । 

कार्यक्रममा प्रहरी अतिरिक्त महानिरीक्षकहरू, प्रहरी नायव महानिरीक्षकहरू, वरिष्ठ प्रहरी अधिकृतहरू, सञ्चारकर्मीहरू, आमन्त्रित अतिथिहरू लगायत प्रहरी अधिकृत तथा जवानहरूको उपस्थिति रहेको थियो । 


सम्बन्धित समाचार
प्रहरी महानिरीक्षक डा. मनोज कुमार केसीबाट केन्द्रीय गुनासो व्यवस्थापन डेस्क उद्‌घाटन
२०८३-०८-०४

काठमाडौं, प्रहरी महानिरीक्षक डा. मनोज कुमार केसीले नेपाल प्रहरी प्रधान कार्यालयमा शुक्रबार आयोजित एक कार्यक्रमबीच केन्द्रीय गुनासो व्यवस्थापन डेस्कको उद्‍घाटन गर्नुभएको छ । उक्त अवसरमा प्रहरी महानिरीक्षक केसीले नेपाल प्रहरीको CUG सेवामा आबद्ध आधारभूत तहका प्रहरी कार्यालय सहयोगीदेखि प्रहरी वरिष्ठ हवल्दारसम्मका ५४ हजार १ सय २२ जना प्रहरी कर्मचारीहरूको मोबाइलमा एकैसाथ गुनासो दर्ताका लागि Google Form Link पठाउनुका साथै एक जना प्रहरी कर्मचारीको टेलिफोन मार्फत गुनासो सुन्नु भई उक्त डेस्कको औपचारिक शुभारम्भ गर्नुभएको हो । साथै उहाँले उक्त डेस्कको निरीक्षण एवम् अवलोकन गर्नुका साथै उक्त डेस्कबाट प्रवाह हुने सेवा बारे जानकारी समेत लिनुभयो ।  प्रहरी संगठनको जगको रूपमा रहेका प्रहरी कार्यालय सहयोगीदेखि प्रहरी वरिष्ठ हवल्दारसम्म आधारभूत तहका कर्मचारीहरूको पेशागत जीवनलाई अझ सुरक्षित, सम्मानित, मर्यादित र न्यायपूर्ण बनाउन तथा कार्यक्षेत्रमा भोग्नु परेका समस्या, कठिनाई, विभेद र गुनासाहरूलाई उचित सम्बोधन गर्ने उद्देश्यले उक्त डेस्कको स्थापना भएको हो । उक्त अवसरमा प्रहरी महानिरीक्षक केसीले आधारभूत तहका प्रहरी कर्मचारीहरूको गुनासो, पीरमर्काहरू विभिन्न तहहरू पार गरेर नेतृत्व तहसम्म आइपुग्न कठिन भएको कुरालाई मनन गर्दै ती गुनासो तथा पीरमर्काहरू अझ द्रुत र छिटो गतिमा सम्बोधन गर्ने गरी यो डेस्क स्थापना गरिएको बताउनुभयो । आधारभूत तह प्रहरी संगठनको आधारभूत स्तम्भ हुनुका साथै सडकदेखि सीमा सम्म, प्रहरी कार्यालयदेखि विपद् घटनास्थलसम्म जनताले देख्ने र महसुस गर्ने असली अनुहार भएको चर्चा गर्दै आधारभूत तह सन्तुष्ट नभए सम्म जनताले गुणस्तरीय र प्रभावकारी प्रहरी सेवा प्राप्त गर्न कठिनाई हुने उहाँले बताउनुभयो ।प्रहरी महानिरीक्षक केसीले प्रहरी कर्मचारीहरूको गुनासोको प्रभावकारी सम्बोधन समग्र कार्यसम्पादनसँग जोडिएको हुनाले यो डेस्क केबल गुनासो दर्ता गर्ने ठाउँ मात्र नभई नेतृत्व तह र आधारभूत तह बीचको विश्वासको सेतु भएको उल्लेख गर्दै गुनासोकर्ताहरूको गोपनीयतालाई विशेष प्राथमिकतामा राखी हरेक गुनासोहरूलाई गम्भीरतापूर्वक सम्बोधन गर्दै डेस्कको प्रभावकारी संचालन गर्न डेस्कको जिम्मेवारीमा खटिएका प्रहरी कमर्चारीहरूलाई निर्देशन दिनुभयो । कार्यक्रममा केन्द्रीय गुनासो व्यवस्थापन डेस्कका संयोजक प्रहरी उपरीक्षक गोविन्द पुरीले स्वागत मन्तव्य व्यक्त गर्नुभएको थियो ।  कार्यक्रममा प्रहरी अतिरिक्त महानिरीक्षकहरू, प्रहरी नायव महानिरीक्षकहरू, वरिष्ठ प्रहरी अधिकृतहरू लगायतको उपस्थितिका साथै ७ वटै प्रदेश प्रहरी कार्यालयहरू, नेपाल प्रहरी प्रदेश कार्यालयहरू, नेपाल प्रहरी शिक्षालय, नेपाल प्रहरी युक्ति तालिम महाविद्यालय जर्गाह, प्रदेश प्रहरी तालिम केन्द्रहरू, अन्तर्राष्ट्रिय विमानस्थल सुरक्षा कार्यालय, जिल्ला प्रहरी परिसरहरू, जिल्ला प्रहरी कार्यालयहरू, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयहरू, नेपाल प्रहरी पहरा गण, काठमाडौं उपत्यका विशेष सुरक्षा प्रहरी गण तथा प्रदेश प्रहरी गणहरू सम्मका कार्यालयका प्रमुख तथा प्रतिनिधिहरूको भर्चुअल उपस्थिति रहेको थियो ।  नेपाल प्रहरी संगठनको ८२ % भन्दा बढी जनशक्तिहरू आधारभूत तहका कर्मचारीहरू रहेको कुरालाई मनन गर्दै प्रहरी नियमावली २०७१ को नियम १९६ बमोजिम कार्यादेश जारी गरी यस डेस्कको स्थापना गरिएको हो । नेपाल प्रहरीका विशेष गरी प्रहरी कार्यालय सहयोगीदेखि प्रहरी वरिष्ठ हवल्दारसम्म आधारभूत तहका प्रहरी कर्मचारीहरूले जायज गुनासाहरू स्वस्फूर्त प्रस्तुत गर्न सक्ने वातावरण निर्माण गर्नु, प्रहरी कर्मचारीहरूका लागि सहज, पहुँच योग्य, गोप्य, निष्पक्ष र एकीकृत प्रणाली स्थापना गर्नु, प्राप्त गुनासाहरूको निष्पक्ष, प्रमाणमा आधारित र शीघ्र सम्बोधन गर्नु, गुनासो सम्बोधनका लागि जिम्मेवार संयन्त्रहरूको प्रभावकारिता अभिवृद्धि गर्नु, सुपरिवेक्षक तथा जिम्मेवार अधिकारीहरूमा जवाफदेहिता अभिवृद्धि गर्नु, संगठनभित्र दोहोरिरहने समस्या तथा प्रणालीगत कमजोरीहरूको पहिचान गरी नीतिगत, प्रशासनिक तथा कल्याणकारी सुधारका उपायहरू अवलम्बन गर्नु यस डेस्क स्थापनाको मुख्य उद्देश्य रहेको छ । 

वित्तीय अपराध अनुसन्धानमा सबै सरोकारवाला निकायहरूको प्रभावकारी र परिणाममुखी समन्वय अपरिहार्य- प्रहरी महानिरीक्षक डा. मनोज कुमार केसी
२०८३-०८-०१

काठमाडौं, प्रहरी महानिरीक्षक डा. मनोज कुमार केसीले वित्तीय अपराधको अनुसन्धानमा नेपाल प्रहरीको एकल प्रयास मात्र पर्याप्‍त नहुने उल्लेख गर्दै नेपाल राष्ट्र बैंक, वित्तीय जानकारी ईकाइ, सम्पत्ति शुद्धिकरण अनुसन्धान विभाग, बैंक तथा वित्तीय संस्था, दूरसञ्चार तथा इन्टरनेट सेवा प्रदायक लगायत सम्पूर्ण सम्बन्धित निकायहरूको प्रभावकारी र परिणाममुखी समन्वय अपरिहार्य रहेको बताउनुभएको छ । प्रत्येक निकायको कानुनी अधिकार क्षेत्र र जिम्मेवारीको सम्मान गर्दै सूचना आदान-प्रदान, प्रमाणको शीघ्र उपलब्धता, प्राविधिक सहयोग र अनुसन्धान तथा अभियोजन बिचको समन्वयलाई संस्थागत बनाउनुपर्ने बताउँदै सीमापार वित्तीय कारोबार र अपराध सञ्जालको हकमा अन्तर्राष्ट्रिय सहकार्य र पारस्पारिक कानुनी सहायतालाई थप प्रभावकारी बनाउन आवश्यक रहेको उहाँले उल्लेख गर्नुभयो । नेपाल प्रहरी प्रधान कार्यालय अपराध अनुसन्धान विभागको ७१औं स्थापना दिवसको अवसरमा नेपाल प्रहरी प्रधान कार्यालयमा मंगलबार आयोजित ‘वित्तीय अपराध अनुसन्धान : प्रमाण संकलनदेखि फैसलासम्म’ विषयक एकदिवसीय कार्यशाला गोष्ठीलाई सम्बोधन गर्दै प्रहरी महानिरीक्षक केसीले उक्त कुरा बताउनुभएको हो । सो अवसरमा प्रहरी महानिरीक्षक डा. मनोज कुमार केसीले अपराध अनुसन्धान विभागद्वारा प्रकाशित ‘नेपाल प्रहरीले अनुसन्धान गरेका चर्चित घटनाहरूको सङ्ग्रह भाग-३’ पुस्तकको विमोचन गर्नुभयो । विमोचित पुस्तक विगतको अनुसन्धानको अनुभव, चुनौती, सिकाई र सफलतालाई संस्थागत ज्ञानको रूपमा अभिलेखीकरण गर्ने महत्वपूर्ण प्रयास रहेको उल्लेख गर्दै यसमा समेटिएका घटनाहरू नयाँ पुस्ताका अनुसन्धानकर्ताको लागि सिकाईको स्रोत बन्ने र अनुसन्धान पद्धतिमा सुधार गरी अनुसन्धानलाई अझ प्रभावकारी बनाउने आधार तयार गर्ने अपेक्षा लिएको उहाँले बताउनुभयो । कार्यक्रममा प्रहरी महानिरीक्षक केसीले नेपाल प्रहरीको अपराध अनुसन्धान प्रणालीलाई व्यावसायिक र वैज्ञानिक बनाउने महत्वपूर्ण जिम्मेवारी निर्वाह गर्दै आएको अपराध अनुसन्धान विभागको स्थापना दिवसको अवसरमा शुभकामना व्यक्त गर्दै अपराध अनुसन्धान विभागले नेपाल प्रहरीको अपराध अनुसन्धानको क्षमता विकास, जटिल र संवेदनशील अपराधको अनुसन्धानको मार्गनिर्देशन, अनुसन्धान पद्धतिको संस्थागत सुदृढिकरण र व्यावसायिक दक्षता अभिवृद्धिमा महत्वपूर्ण भूमिका निर्वाह गर्दै आइरहेको चर्चा गर्नुभयो । यसै अवसरमा आयोजित कार्यशाला गोष्ठी समयसापेक्ष र अत्यन्तै महत्वपूर्ण रहेको उल्लेख गर्दै कार्यशालाबाट वित्तीय अपराध अनुसन्धानको विद्यमान चुनौतीको वस्तुनिष्ठ विश्लेषण, प्रमाण संकलनदेखि अभियोजन र फैसलासम्मको प्रकृयामा सुधारका उपायहरू तथा सम्बन्धित निकाय बिचको समन्वयलाई थप प्रभावकारी बनाउन व्यावहारिक सुझाव प्राप्त हुने अपेक्षा लिएको उहाँले बताउनुभयो ।प्रहरी महानिरीक्षक केसीले वर्तमान अवस्थामा अपराधको स्वरूप, अपराधीको कार्यशैली र अपराधको सञ्जाल तीव्र रूपमा परिवर्तन भइरहेको, प्रविधिको विकासले अपराध गर्ने तरिका परिवर्तन भइरहेको एवम् विशेष गरी बैंकिङ कसूर, वित्तीय ठगी, सहकारी तथा लगानी सम्बन्धी अनियमितता, अनलाईन मार्फत हुने आर्थिक अपराध, सम्पत्ति शुद्धीकरण तथा अवैध वित्तीय कारोबारको बढ्दो जटिल स्वरूपले अपराध अनुसन्धानमा नयाँ चुनौती सामना गर्नुपर्ने बताउनुभयो ।  वित्तीय अपराधको बद्लिदो स्वरूपलाई सम्बोधन गर्न परम्परागत अनुसन्धान पद्धतिलाई आधुनिक अनुसन्धान प्रणालीतर्फ रूपान्तरण गर्दै नवीनतम् प्रविधिको प्रयोग, डिजिटल फोरेन्सिक क्षमताको अभिवृद्धि, विशेषज्ञ जनशक्तिको विकास र आवश्यक स्रोत साधनको व्यवस्थापन गर्नुपर्नेमा उहाँले जोड दिनुभयो । साथै उहाँले अनुसन्धानलाई निष्पक्ष, पारदर्शी, व्यावसायिक, प्रमाणमुखी र परिणाममुखी बनाउँदै कुनै पनि दबाब र प्रभावबाट मुक्त रहि कानुन बमोजिम उत्कृष्ट कार्यसम्पादन गर्न समेत उपस्थित प्रहरी कर्मचारीहरूलाई निर्देशन दिनुभयो । कार्यक्रममा महान्यायाधिवक्ताको कार्यालयका सह-न्यायाधिवक्ता दिनेश प्रसाद घिमिरे र नेपाल राष्ट्र बैंकका निर्देशक इन्द्रा चम्लागाई (मैनाली) ले आ-आफ्नो शुभकामना मन्तव्य व्यक्त गर्नुभएको थियो ।कार्यशालामा महान्यायाधिवक्ताको कार्यालयका सह-न्यायाधिवक्ता ज्ञान प्रसाद भुषालले वित्तीय अपराध अनुसन्धानमा अभियोजन तथा फैसलाका पक्षहरू सम्बन्धी, नेपाल प्रहरी प्रधान कार्यालय अपराध अनुसन्धान विभागका प्रहरी उपरीक्षक मोहन कुमार थापाले वित्तीय अपराधको अवस्था, प्रकृति र प्रवृत्ति सम्बन्धी, साईबर ब्यूरोका प्रहरी उपरीक्षक दिपक राज अवस्थीले वित्तीय अपराध अनुसन्धानमा डिजिटल प्रमाण संकलन सम्बन्धी तथा केन्द्रीय अनुसन्धान ब्यूरोका प्रहरी नायव उपरीक्षक दान बहादुर थापाले वित्तीय अपराधको अनुसन्धानमा सम्पत्तिको खोजी र चुनौतीहरू सम्बन्धी आ-आफ्नो प्रस्तुतीकरण गर्नुभएको थियो भने प्रस्तुतीकरणका विषयहरूमा सहभागीहरू बिच वृहत्त छलफल समेत भएको थियो । नेपाल प्रहरी प्रधान कार्यालय अपराध अनुसन्धान विभागका प्रहरी नायव महानिरीक्षक ओम बहादुर रानाले धन्यवाद मन्तव्य व्यक्त गर्नुभएको उक्त कार्यक्रममा प्रहरी वरिष्ठ उपरीक्षक मुकुन्द मरासिनीले स्वागत मन्तव्य व्यक्त गर्नुभएको थियो । कार्यक्रममा प्रहरी अतिरिक्त महानिरीक्षकहरू, प्रहरी नायव महानिरीक्षकहरू, सम्पत्ति शुद्धीकरण अनुसन्धान विभागका पदाधिकारीहरू, नेपाल धितोपत्र बोर्ड, भूमि व्यवस्थापन तथा अभिलेख विभाग, नेपाल बैंकर्स एसोसिएसन, कसुरजन्य सम्पत्ति व्यवस्थापन विभाग, वित्तीय जानकारी इकाई, नेपाल बीमा प्राधिकरण, नेपाल दूरसञ्चार प्राधिकरण लगायत सम्पुर्ण सरोकारवाला निकायका प्रतिनिधिहरूको उपस्थितिको साथै ७ वटै प्रदेश प्रहरी कार्यालयहरू, नेपाल प्रहरी प्रदेश कार्यालयहरू, जिल्ला प्रहरी परिसरहरू र जिल्ला प्रहरी कार्यालयहरू एवम् मातहत मुद्दा चल्ने इकाईसम्मका कार्यालयका प्रमुख तथा प्रतिनिधिहरूको भर्चुअल उपस्थिति रहेको थियो ।  साथै प्रहरी महानिरीक्षक डा. मनोज कुमार केसीको प्रमुख आतिथ्यतामा नेपाल प्रहरी प्रधान कार्यालयमा मंगलबार आयोजित ‘अपराध अनुसन्धान विभागको विशिष्टिकरण तथा प्रविधिमैत्री अपराध अनुसन्धान’ विषयक अन्तरक्रिया तथा छलफल कार्यक्रम सम्पन्न भएको छ । सो अवसरमा प्रहरी महानिरीक्षक केसीले अपराध अनुसन्धान विभागका पूर्व प्रमुखहरू तथा अपराध अनुसन्धान विभागमा कार्यरत प्रहरी अधिकृतहरूसँग अपराध अनुसन्धान प्रणालीलाई व्यावसायिक र वैज्ञानिक बनाउने लगायत समसामायिक विषयमा अन्तरक्रिया र छलफल समेत गर्नुभयो । सो अवसरमा अपराध अनुसन्धान विभागका प्रहरी उपरीक्षक गोबिन्द पुरीले अपराध अनुसन्धान विभागको विद्यमान् संगठनात्मक संरचना, अपराध अनुसन्धान विभागको विकासक्रम, विशिष्टिकृत अनुसन्धान इकाईहरू, अनुसन्धान गर्ने इकाईहरूको संख्यात्मक विवरण, अपराध दर्ता संख्याको प्रदेशगत विवरण, त्रिवर्षीय मुद्दा दर्ता तथ्याङ्क लगायतका विषयमा प्रस्तुतीकरण गर्नुभएको थियो ।

सुरक्षा योजना थप मजबुत बनाई कार्यसम्पादन गर्नुपर्ने - प्रहरी महानिरीक्षक डा. मनोज कुमार केसी
२०८३-०७-२८

काठमाडौं, प्रहरी महानिरीक्षक डा. मनोज कुमार केसीले छठ पर्वको समयमा कुनै पनि अवाञ्छित गतिविधि हुन नदिन विगतमा घटेका घटनाहरूको विश्लेषण गरी सुरक्षा योजना थप मजबुत बनाई कार्यसम्पादन गर्न निर्देशन दिनुभएको छ ।  नेपाल प्रहरी प्रधान कार्यालयबाट भर्चुअल माध्यमद्वारा छठ पर्वको समयमा अपनाउनुपर्ने सुरक्षा संवेदनशीलता एवम् समसामयिक विषयवस्तुका सम्बन्धमा शनिबार काठमाडौं उपत्यका प्रहरी कार्यालय तथा ७ वटै प्रदेश प्रहरी कार्यालयका प्रमुख तथा प्रतिनिधिहरूलाई निर्देशन सम्बोधनको क्रममा प्रहरी महानिरीक्षक केसीले उक्त कुरा बताउनुभएको हो ।  प्रहरी महानिरीक्षक केसीले प्रदेश प्रहरी कार्यालयका प्रमुखहरूले छठ पर्वको समयमा कुनै पनि आपराधिक क्रियाकलापका घटनाहरू हुन नदिन आ-आफ्नो क्षेत्रमा अनुगमन, सुपरीवेक्षण र निरीक्षण गरी भएका कमी कमजोरी र त्रुटीहरूलाई समयमै सुधार गर्नुपर्ने बताउनुभयो । छठ पर्वको समयमा नदी, तलाउ र पोखरीका घाटहरूमा ठूलो भीडभाड हुने भएकाले विशिष्ट  व्यक्तिहरूको सुरक्षाका लागि विशेष सुरक्षा रणनीति अपनाउनुपर्ने उहाँले बताउनुभयो । पर्वको समयमा कुनै पनि घटना हुन नदिन थप सचेत भई कार्य गर्नुपर्ने बताउँदै परिस्थितिको मूल्याङ्कन गरी बल प्रयोगमा विशेष संवेदनशीलता अपनाउनु पर्नेमा उहाँले जोड दिनुभयो । प्रहरी महानिरीक्षक केसीले चाडपर्व पश्चात हुन सक्ने अवाञ्छित गतिविधिहरू सम्बन्धी सूचना संकलन गरी विशेष सुरक्षा योजना बनाउन निर्देशन दिनुभयो । सीमा नाकामा हुनसक्ने आपराधिक गतिविधि एवम् तस्करी नियन्त्रणमा शून्य सहनशीलताको नीति अवलम्बन गरी कार्य गर्नुपर्ने बताउँदै गैरव्यावसायिक क्रियाकलापमा संलग्न प्रहरी कर्मचारीहरूलाई कानुनी दायरामा ल्याइने समेत उहाँले बताउनुभयो । कार्यक्रममा प्रहरी महानिरीक्षक केसीले काठमाडौं उपत्यका प्रहरी कार्यालय तथा ७ वटै प्रदेश प्रहरी कार्यालयका प्रमुख तथा प्रतिनिधिहरूबाट छठ पर्वको समयमा अपनाइएका सुरक्षा योजनाबारे जानकारी समेत लिनुभयो । कार्यक्रममा प्रहरी अतिरिक्त महानिरीक्षक, प्रहरी वरिष्ठ उपरीक्षकहरू तथा प्रहरी अधिकृतहरूको उपस्थिति रहेको थियो ।

चाडपर्व लक्षित सुरक्षा योजना प्रभावकारी रूपमा कार्यान्वयन गर्नुपर्ने - प्रहरी महानिरीक्षक डा. मनोज कुमार केसी
२०८३-०७-२२

काठमाडौं, प्रहरी महानिरीक्षक डा. मनोज कुमार केसीले नजिकिँदै गरेको चाडपर्वहरू लक्षित सुरक्षा योजना अनुरूप प्रभावकारी रूपमा प्रहरी परिचालन एवम् कार्यान्वयन गरी कुनै पनि अवाञ्छित गतिविधि हुन नदिन प्रहरी कर्मचारीहरू थप सक्रिय हुनुपर्ने बताउनुभएको छ ।नेपाल पुलिस क्लव भृकुटीमण्डपमा आइतबार आयोजित कार्यक्रम बीच नजिकिँदै गरेको महान चाडपर्व दिपावली, नेपाल सम्वत्, छठ लगायतका पर्वहरूको समयमा अपनाउनुपर्ने सुरक्षा संवेदनशीलता एवम् समसामयिक विषयवस्तुका सम्बन्धमा काठमाडौं उपत्यका प्रहरी कार्यालय रानीपोखरी तथा मातहतमा कार्यरत प्रहरी अधिकृतहरूलाई निर्देशन सम्बोधनको क्रममा प्रहरी महानिरीक्षक केसीले उक्त कुरा बताउनुभएको हो ।   प्रहरी महानिरीक्षक केसीले काठमाडौं उपत्यकाको प्रभावकारी सुरक्षा व्यवस्था कार्यान्वयनलाई प्राथमिकतामा राखि चाडपर्वहरूको समयमा हुन सक्ने लुटपाट, चोरी, लगायत कुनै पनि आपराधिक क्रियाकलापका घटनाहरूलाई समयमै सम्बोधन गर्न प्रभावकारी रूपमा प्रहरी परिचालन गर्नुपर्ने बताउनुभयो । आ-आफ्नो जिम्मेवार क्षेत्रहरूमा सुरक्षा व्यवस्थापनको निम्ति सुरक्षा योजना प्रभावकारी रूपमा कार्यान्वयन गर्न सरोकारवाला सबै पक्षहरूसँग समन्वय र सहकार्य गरी व्यावसायिक, उत्तरदायी एवम् जवाफदेही प्रहरी सेवा प्रवाह गर्नुपर्ने उहाँले बताउनुभयो ।प्रहरी महानिरीक्षक केसीले चाडपर्वको समयमा हुने सक्ने सवारी दुर्घटना न्यूनीकरणका लागि प्रभावकारी सुरक्षा व्यवस्थालाई विशेष ध्यान दिँदै ट्राफिक व्यवस्थापनलाई नागरिकको अपेक्षा अनुरूप सहजीकरण गरी आ-आफ्नो दायित्व निर्वाह गर्नुपर्नेमा विशेष जोड दिनुभयो । साथै प्रहरी कर्मचारीहरूको व्यवहार, आचरण तथा कार्यप्रवाहलाई थप सुधार गर्दै नागरिकमैत्री प्रहरी सेवा प्रदान गर्नु पर्नेमा उहाँले जोड दिनुभयो । विशेष गरी चाडपर्वहरूको समयमा पटका लगायतका विष्फोटक पदार्थको कारोबार नियन्त्रण गर्नुका साथै सामाजिक सद्भावमा खलल पार्न सक्ने कुनै पनि घटनाप्रति थप सचेत भई कार्य गर्नुपर्नेमा उहाँले जोड दिनुभयो ।कार्यक्रममा काठमाडौं उपत्यका प्रहरी कार्यालय रानीपोखरीका प्रहरी अतिरिक्त महानिरीक्षक सुशील सिंह राठौरले काठमाडौं उपत्यकाको शान्ति सुरक्षा, चुनौतीहरू र अपनाउनुपर्ने सुरक्षा सावधानी लगायत समसामयिक विषयवस्तुको बारेमा जानकारी दिनुभएको थियो । कार्यक्रममा प्रहरी नायव महानिरीक्षक गोबिन्द थपलिया, वरिष्ठ प्रहरी अधिकृतहरू, काठमाडौं उपत्यका प्रहरी कार्यालय रानीपोखरी तथा मातहतमा कार्यरत प्रहरी अधिकृतहरूको उपस्थितिको रहेको थियो ।

प्रहरी महानिरीक्षक डा. मनोज कुमार केसीको प्रमुख आतिथ्यतामा प्राज्ञिक पदवी प्रदान तथा सम्मान समारोह सम्पन्न
२०८३-०७-२०

काठमाडौं,  प्रहरी महानिरीक्षक डा. मनोज कुमार केसीको प्रमुख आतिथ्यतामा नेपाल प्रहरी अस्पताल महाराजगंजमा शुक्रबार आयोजित प्राज्ञिक पदवी प्रदान तथा सम्मान समारोह सम्पन्न भएको छ ।  सो अवसरमा प्रहरी महानिरीक्षक डा. मनोज कुमार केसीले नेपाल प्रहरी अस्पतालमा कार्यरत प्रहरी अधिकृतहरूलाई सह-प्राध्यापक र विशेष अतिथि चिकित्सा विज्ञान राष्ट्रिय प्रतिष्ठानका उपकुलपति प्राध्यापक डा. विवेक आचार्यले सहायक प्राध्यापकको प्रमाणपत्र प्रदान गर्नुका साथै उहाँहरूलाई सम्मान समेत गर्नुभयो । स्वास्थ्य सम्बन्धी दक्ष जनशक्ति उत्पादन गरी स्वास्थ्य सेवा मार्फत जनताको सेवामा समर्पित हुने सोचका साथ नेपाल प्रहरीले नेपाल प्रहरी मेडिकल कलेजको परिकल्पना गरी अगाडि बढिरहेको छ । मेडिकल कलेजको आधार स्तम्भको रूपमा रहेको प्राविधिक जनशक्तिको प्राज्ञिक वृत्ति विकासलाई अगाडि बढाउने संगठनको नीति अनुरूप २०८१ फाल्गुण २७ गते नेपाल प्रहरी अस्पताल र चिकित्सा विज्ञान राष्ट्रिय प्रतिष्ठान बीच सम्झौता भएको थियो । यसै सन्दर्भमा चिकित्सा विज्ञान राष्ट्रिय प्रतिष्ठान प्राज्ञिक परिषद्को २०८२ चैत्र ४ गतेको बैठकले नेपाल प्रहरी अस्पतालमा कार्यरत मापदण्ड पुरा गर्नुभएका १७ जना चिकित्सकलाई सहप्राध्यपक, १८ जना चिकित्सकलाई सहायक प्राध्यापक एवम् एक जना नर्सिङ अधिकृतलाई सहायक प्राध्यापकको पदवी प्रदान गरेको हो । सह-प्राध्यापकको प्राज्ञिक पदवी प्राप्त गर्नुहुनेहरूमा नेपाल प्रहरी अस्पतालका मेडिकल डाईरेक्टर प्राविधिक प्रहरी अतिरिक्त महानिरीक्षक सुन्दर प्रसाद ह्योजु, प्राविधिक प्रहरी नायव महानिरीक्षकहरू डा. संजय विक्रम श्रेष्ठ र डा. मनोज कुमार यादव, प्राविधिक प्रहरी वरिष्ठ उपरीक्षकहरू डा. विपिन कुमार श्रेष्ठ, डा. अमिन कुमार श्रेष्ठ, डा. पवन कुमार राय र डा. सेवक श्रेष्ठ, प्राविधिक प्रहरी उपरीक्षकहरू डा. अच्युत विक्रम हमाल, डा. सन्तोष जोशी, डा. रोजिना मानन्धर, डा. ज्योती बाँस्तोला पौडेल, डा. अञ्जली तण्डुकार, डा. दीपा चुडाल र डा. सुवास थापा तथा प्राविधिक प्रहरी नायव उपरीक्षकहरू डा. अर्चना यादव र डा. निशेफ अधिकारी रहेका छन् ।  यसैगरी सहायक प्राध्यापकको प्राज्ञिक पदवी प्राप्त गर्नुहुनेहरूमा प्राविधिक प्रहरी नायव उपरीक्षकहरू डा. रोशन कुमार निराला, डा. सन्तोष कुमार ठाकुर, डा. शिरिषचन्द्र रेग्मी, डा. प्रशंसा शाक्य, डा. श्याम कृष्ण लौडारी, डा. राजन सुवेदी, डा. सन्देश लामिछाने, डा. आशिष मोहन भट्टराई, डा. विदुर प्रसाद आचार्य र डा. रजनी महर्जन तथा प्राविधिक प्रहरी निरीक्षकहरू डा. नितु भण्डारी, डा. विजय कुमार श्रेष्ठ र डा. आलोक सिंह रहेका छन् ।  समारोहलाई सम्बोधन गर्दै प्रहरी महानिरीक्षक डा. मनोज कुमार केसीले सह-प्राध्यापक एवम् सहायक प्राध्यापकको प्राज्ञिक उपाधिहरू केवल व्यक्तिगत शैक्षिक उपलब्धी वा सम्मानका प्रमाणपत्र मात्र नभई वर्षौँ देखिको अध्ययन, अनुसन्धान, लगनशीलता र व्यावसायिक निष्ठाको जीवन्त प्रमाण भएको चर्चा गर्दै यी प्राज्ञिक उपाधि हासिल गर्न सफल हुनुभएका सम्पूर्ण चिकित्सक तथा नर्सिङ अधिकृतहरूलाई समग्र नेपाल प्रहरीको तर्फबाट हार्दिक बधाई तथा शुभकामना व्यक्त गर्नुभयो । प्रहरी महानिरीक्षक केसीले नेपाल प्रहरीले स्वास्थ्य सेवालाई थप विशिष्टिकृत, गुणस्तरीय र अनुसन्धानमुखी बनाउँदै नेपाल प्रहरी अस्पताललाई एक सक्षम प्राज्ञिक तथा कार्यात्मक मेडिकल कलेजका रूपमा विकास गर्ने दीर्घकालीन यात्रामा अघि बढिरहेको उल्लेख गर्दै नेपाल प्रहरी मेडिकल कलेजको स्थापना तथा विकासको यात्रामा आज प्राज्ञिक उपाधि हासिल गर्नुभएका प्रहरी अधिकृतहरूले आर्जन गर्नुभएको ज्ञान, अनुभव र प्राज्ञिक क्षमतालाई संस्थाको सेवा प्रवाह सुधार, अनुसन्धान, अध्यापन र नवीनतम् चिकित्सा अभ्यासको विकासमा उपयोग गर्ने विश्वास व्यक्त गर्नुभयो ।  कार्यक्रममा विशेष अतिथि चिकित्सा विज्ञान राष्ट्रिय प्रतिष्ठानका उपकुलपति प्राध्यापक डा. विवेक आचार्यले प्राज्ञिक पदवी प्राप्त गर्नुहुने चिकित्सकहरूलाई बधाई तथा शुभकामना दिनुहुँदै प्राप्त जिम्मेवारीलाई उत्कृष्ट रूपमा बहन गर्नुपर्ने बताउनुभयो ।  कार्यक्रममा प्रहरी अतिरिक्त महानिरीक्षकहरू, प्रहरी नायव महानिरीक्षकहरू, वरिष्ठ प्रहरी अधिकृतहरू, नेपाल मेडिकल काउन्सिलका पदाधिकारीहरू लगायत अन्य आमन्त्रित महानुभावहरूको उपस्थिति रहेको थियो । 

एकीकृत साइबर स्क्याम प्रतिकार्य केन्द्रबाट सेवा प्रारम्भ
२०८३-०७-२०

काठमाडौं,  प्रहरी महानिरीक्षक डा. मनोज कुमार केसीको उपस्थितिमा साइबर ब्यूरोको कार्यालय सामाखुशीमा शुक्रबार आयोजित कार्यक्रम बीच एकीकृत साइबर स्क्याम प्रतिकार्य केन्द्र (IACSC) बाट सेवा प्रारम्भ भएको छ । सो अवसरमा प्रहरी महानिरीक्षक डा. मनोज कुमार केसीले साइबर, अनलाइन ठगी अहिलेको चुनौतीको रूपमा देखा परिरहेको अवस्थामा त्यसलाई उचित सम्बोधन गर्न त्यस क्षेत्रसँग सम्बन्धित सम्पूर्ण निकायहरूको आपसी सहयोग, समन्वय र सहकार्य अत्यन्तै महत्वपूर्ण रहेको बताउनुभयो । सबै सम्बन्धित निकायहरूको सहकार्यबाट प्रभावकारी अनुसन्धान हुने विश्वास समेत उहाँले व्यक्त गर्नुभयो । नेपाल सरकार (मन्त्रीस्तर) को २०८३ असोज २३ गतेको निर्णयबाट स्वीकृत ‘एकीकृत साइबर स्क्याम प्रतिकार्य केन्द्र (IACSC) स्थापना र कार्यसञ्चालन सम्बन्धी दिग्दर्शन, २०८३’ बमोजिम स्थापना भएको यस केन्द्रमा नियामक निकाय, प्रहरी, बैंक, वालेट, दूरसञ्चार र इन्टरनेट सेवा प्रदायक संस्थाहरूले एउटै भौतिक कक्षबाट एकीकृत रूपमा कार्य गरी साइबर स्क्याम र ठगीहरूलाई यथाशीघ्र प्रतिकार्य गरी जोखिम घटाउँदै डिजिटल वित्तीय प्रणालीलाई सुरक्षित र विश्वसनीय बनाउने लक्ष्य राखेको   छ । साइबर ठगी सम्बन्धी उजुरी तथा सूचनाहरूलाई २४ सै घण्टा प्राप्त गर्नका लागि सम्पर्क अधिकृत तोकी १२४७ आकस्मिक फोन नम्बर समेतको व्यवस्था गरिएको छ । कार्यक्रममा केन्द्रीय अनुसन्धान ब्यूरोका प्रमुख प्रहरी अतिरिक्त महानिरीक्षक उमा प्रसाद चतुर्वेदी, साइबर ब्यूरोका प्रमुख प्राविधिक प्रहरी नायव महानिरीक्षक नवीन्द अर्याल, विभिन्न बैंक तथा वित्तीय संस्थाका पदाधिकारीहरू, डिजिटल वालेट/भुक्तानी सेवा प्रदायकका प्रतिनिधिहरू, दूरसञ्चार तथा इन्टरनेट सेवा प्रदायकहरूका प्रतिनिधिहरू लगायतको उपस्थिति रहेको थियो ।