६९औं प्रहरी दिवस २०८१ का अवसरमा पुनर्मिलन कार्यक्रम सम्पन्न
२०८१-०६-३०
- A
- A-
- A+
काठमाडौं, ६९औं प्रहरी दिवस २०८१ का अवसरमा नेपाल प्रहरीद्वारा आयोजित पुनर्मिलन कार्यक्रम नेपाल प्रहरी प्रधान कार्यलयमा बुधबार सम्पन्न भएको छ ।
उक्त अवसरमा प्रहरी महानिरीक्षक बसन्त बहादुर कुँवरले प्रहरी नायव उपरीक्षक जयश्वर रिमालको शब्द संकलन, वीरेन्द्र भाट ‘विपिन’ को सम्पादन तथा टंक बुढाथोकी र सदीक्षा कट्टेलको स्वरमा रहेको “हामी प्रहरी-जनताका पहरेदार” बोलको गित सार्वजनिकीकरण गर्नुभयो । साथै उहाँले ६९औं प्रहरी दिवस २०८१ अन्तर्गतका विविध कार्यक्रम उत्कृष्ट ढंगले प्रस्तुत गर्नुहुने महानुभावहरूलाई पुरस्कार तथा प्रशंसापत्र प्रदान गर्नुभयो ।
पुनर्मिलन कार्यक्रममा प्रहरी महानिरीक्षक बसन्त बहादुर कुँवरले अग्रज प्रहरीहरूले इतिहास कालदेखि संगठनको निम्ति गर्नुभएको त्याग, समर्पण, भविष्य लक्षित नीति निर्माण, सांगठनिक सुदृढिकरण लगायतका सामूहिक कार्यद्वारा नै हामी अहिले वर्तमान अवस्थामा पुग्न सक्षम भएको चर्चा गर्नुभयो । सगठनको श्रीवृद्धिको लागि अग्रजहरूले निर्वाह गरेको योगदान अतुलनीय रहेको समेत उहाँले बताउनुभयो । अग्रज प्रहरीद्वारा आ-आफ्नो कार्यकालमा भएका अथक प्रयासहरूको सम्मान गर्दै उक्त प्रयासलाई आगामी पुस्ताले समेत निडरताका साथ निरन्तरता दिई अगाडि बढ्ने उहाँले बताउनुभयो ।
सो अवसरमा नेपाल प्रहरी पूर्व संगठन प्रमुख मञ्चका संयोजक अवकाश प्राप्त प्रहरी महानिरीक्षक मोतिलाल बोहराले प्रहरी सेवामा रहँदा आफ्नो अनुभव बारे चर्चा गर्दै आउँदा दिनमा नेपाल प्रहरीलाई आवश्यक सहयोग गर्न अवकाश प्राप्त प्रहरी कर्मचारीहरू प्रतिवद्ध रहेको उहाँले उल्लेख गर्नुभयो ।
विविध गीत, संगीत र नाटकसहितको साँस्कृतिक कार्यक्रम समेत प्रस्तुत गरिएको उक्त कार्यक्रममा सुदूरपश्चिम प्रदेश सभा सदस्य एवम् अवकाश प्राप्त प्रहरी वरिष्ठ उपरीक्षक मान बहादुर रावल, अवकाश प्राप्त प्रहरी महानिरीक्षकहरू, प्रहरी अतिरिक्त महानिरीक्षकहरू, अवकाश प्राप्त प्रहरी अतिरिक्त महानिरीक्षकहरू, नेपाल प्रहरी श्रीमती संघकी अध्यक्ष एवम् पदाधिकारीहरू लगायतका नेपाल प्रहरीका अवकाश प्राप्त तथा बहालवाला प्रहरी अधिकृतहरूको उपस्थिति रहेको थियो ।