कैलाली, धनगढी उपमहानगरपालिका-३ त्रिनगर ब्यारेलबाट अवैध लागूऔषध ब्राउनसुगर १ ग्रामसहित सोही उपमहानगरपालिका-१ पशुपति टोल बस्ने १८ वर्षीया किशोरीलाई शुक्रबार दिउँसो प्रहरीले पक्राउ गरेको छ । लागूऔषध नियन्त्रण ब्यूरो महेन्द्रनगरबाट खटिएको प्रहरीले उनलाई उक्त लागूऔषधसहित पक्राउ गरेको हो । 

बारा, सुर्वण गाउँपालिका-२ सतगंज तेलकुवाबाट अवैध लागूऔषध गाँजा करिब साढे २ केजी ५ सय ग्रामसहित भारत बिहार राज्य घर भएका ३२ वर्षीय रामबिश्वास पासवानलाई शुक्रबार राति प्रहरीले पक्राउ गरेको छ । विशेष सूचनाको आधारमा ईलाका प्रहरी कार्यालय कवहीबाट खटिएको प्रहरीले तेलकुवाबाट भारततर्फ जाँदै गरेको बीआर ०५ पीबी ५५२३ नम्बरको एम्बुलेन्सलाई जाँच गर्ने क्रममा उक्त गाँजासहित चालक पासवनलाई पक्राउ गरेको हो ।

बारा, महागढिमाई नगरपालिका-११ मधुरी टोल बस्ने ३२ वर्षीय मुनिलाल यादवलाई अवैध लागूऔषध गाँजा १० किलोग्रामसहित शुक्रबार राति प्रहरीले पक्राउ गरेको छ । विशेष सूचनाको आधारमा जिल्ला प्रहरी कार्यालय बाराबाट खटिएको प्रहरीले उनको घर तलासी गर्ने क्रममा उक्त गाँजासहित फेला पारी उनलाई पक्राउ गरेको हो  । 

यसैगरी बारा, महागढिमाई नगरपालिका-७ बस्ने मिश्री प्रसाद यादवको घरबाट अवैध लागूऔषध गाँजा २ सय २५ किलोग्राम शुक्रबार राति प्रहरीले बरामद गरेको छ । विशेष सूचनाको आधारमा जिल्ला प्रहरी कार्यालय बाराबाट खटिएको प्रहरीले उक्त गाँजा फेला पारी बरामद गरेको हो । 

सबै घटनाका सम्बन्धमा प्रहरीले आवश्यक अनुसन्धान गरिरहेको छ ।