अवैध लागूऔषध सहित विभिन्न स्थानबाट १३ जना पक्राउ
२०८३-०५-२०
- A
- A-
- A+
काठमाडौं, त्रिभुवन अन्तर्राष्ट्रिय विमानस्थलको आगमन एरियाबाट अवैध लागूऔषध गाँजा करिब २ किलोग्राम सहित भारतीय नागरिक ३६ वर्षीय फिरोज मोहमदलाई शुक्रबार दिउँसो प्रहरीले पक्राउ गरेको छ । लागूऔषध नियन्त्रण ब्यूरो कोटेश्वरबाट खटिएको प्रहरीले मलेसियन एयरलाईन्सबाट काठमाडौं आएका उनलाई उक्त गाँजा सहित पक्राउ गरेको हो ।
रूपन्देही, लुम्बिनी साँस्कृतिक नगरपालिका-६ बाट अवैध लागूऔषध चरेस जस्तो देखिने पदार्थ ३ ग्राम ५ सय ७० मिलिग्राम, नियन्त्रित लागूऔषध स्पास्मो १ सय ६० ट्याब्लेट र नगद ८ हजार रूपैयाँ सहित २ जनालाई शुक्रबार दिउँसो प्रहरीले पक्राउ गरेको छ । पक्राउ पर्नेहरूमा सोही नगरपालिका-३ ठुलो पडरिया बस्ने २२ वर्षीय राजन भन्ने नसरूद्धिन फकिर र सोही नगरपालिका-२ केवटलिया बस्ने २४ वर्षीय सत्य नारायण यादव रहेका छन् । इलाका प्रहरी कार्यालय लुम्बिनीबाट खटिएको प्रहरीले युपी ५५ ए वाई ०१९८ नम्बरको मोटरसाइकलमा सवार उनीहरूलाई उक्त लागूऔषध सहित फेला पारी पक्राउ गरेको हो ।
बाँके, बैजनाथ गाउँपालिका-२ गुनापुरबाट अवैध लागूऔषध ब्राउनसुगर जस्तो देखिने पदार्थ १ ग्राम २ सय ४० मिलिग्राम सहित २ जनालाई शुक्रबार बेलुकी प्रहरीले पक्राउ गरेको छ । पक्राउ पर्नेहरूमा सोही ठाउँ बस्ने ३० वर्षीय सन्तोष विक र ३० वर्षीय डमर बहादुर कामी रहेका छन् । लागूऔषध नियन्त्रण ब्यूरो शाखा कार्यालय नेपालगंज समेतबाट खटिएको प्रहरीले उनीहरूलाई उक्त पदार्थ सहित पक्राउ गरेको हो । साथै थप अनुसन्धानको क्रममा डमर बहादुरको घर तलासी गर्दा ब्राउनसुगर जस्तो देखिने पदार्थ १ ग्राम ९ सय ६० मिलिग्राम र नगद ८ हजार ८ सय रूपैयाँ फेला पारी प्रहरीले बरामद गरेको छ ।
पर्सा, पकहाँ मैनपुर गाउँपालिका-१ बाट अवैध लागूऔषध गाँजा १ सय १४ किलो २५ ग्राम सहित धादिङ बेनीघाट रोराङ गाउँपालिका-८ बस्ने २१ वर्षीय साजन चेपाङलाई शुक्रबार राति प्रहरीले पक्राउ गरेको छ । इलाका प्रहरी कार्यालय पोखरिया समेतबाट खटिएको प्रहरीले बा.१८ च ३६५७ नम्बरको कार तलासी गर्दा १२ वटा पोका रहेको उक्त परिमाणको गाँजा फेला पारी चालक साजनलाई पक्राउ गरेको हो ।
सुनसरी, इटहरी उपमहानगरपालिका-२ संसारी चोकबाट नियन्त्रित लागूऔषध ट्रामाडोल १ सय २५ ट्याब्लेट र डाइक्लोमाइन १ सय २५ ट्याब्लेट सहित सोही उपमहानगरपालिका-२ बस्ने उदयपुर चौदण्डीगढी नगरपालिका-७ घर भएका १८ वर्षीय किशोरलाई शुक्रबार दिउँसो प्रहरीले पक्राउ गरेको छ । कोशी प्रदेश प्रहरी कार्यालय विराटनगर समेतबाट खटिएको प्रहरीले उनलाई उक्त लागूऔषध सहित पक्राउ गरेको हो ।
झापा, झापा गाउँपालिका-३ कामाटोलीबाट अवैध लागूऔषध ब्राउनसुगर जस्तो देखिने पदार्थ ४ ग्राम ४२ मिलिग्राम सहित अर्जुनधारा नगरपालिका-६ बस्ने १७ वर्षीय किशोरलाई शुक्रबार बेलुकी प्रहरीले पक्राउ गरेको छ । प्रहरी चौकी टाघनडुब्बाबाट खटिएको प्रहरीले उनलाई उक्त पदार्थ सहित पक्राउ गरेको हो ।
यसैगरी झापा, मेचीनगर नगरपालिका-६ बाट अवैध लागूऔषध खैरो हेरोइन जस्तो देखिने पदार्थ ३ ग्राम ७ सय १० मिलिग्राम सहित सोही नगरपालिका-१३ राधाकृष्ण टोल बस्ने २३ वर्षीय बिवेक राजवंशीलाई शनिबार बिहान प्रहरीले पक्राउ गरेको छ । लागूऔषध नियन्त्रण ब्यूरो शाखा कार्यालय काँकरभिट्टा समेतबाट खटिएको प्रहरीले उनलाई उक्त पदार्थ सहित पक्राउ गरेको हो ।
ललितपुर, ललितपुर महानगरपालिका-२४ धापाखेल पशुपति टोलबाट अवैध लागूऔषध खैरो हेरोइन जस्तो देखिने पदार्थ २ ग्राम २ सय ७० मिलिग्राम सहित २ जनालाई शुक्रबार साँझ प्रहरीले पक्राउ गरेको छ । पक्राउ पर्नेहरूमा गोदावरी नगरपालिका-१० चापागाउँ बस्ने ३७ वर्षीय रोशन मिजार र ललितपुर महानगरपालिका-२४ धापाखेल बस्ने ३७ वर्षीय अमित रोका रहेका छन् । प्रहरी प्रभाग धापाखेलबाट खटिएको प्रहरीले बा.८२ प ६४६० नम्बरको मोटरसाइकलमा सवार उनीहरूलाई उक्त पदार्थ सहित फेला पारी पक्राउ गरेको हो ।
कञ्चनपुर, बेलौरी नगरपालिका-१ फटैयाबाट अवैध लागूऔषध ब्राउनसुगर जस्तो देखिने पदार्थ ५ सय ९० मिलिग्राम सहित कैलाली धनगढी उपमहानगरपालिका-३ बोराडाँडी बस्ने २३ वर्षीय नितेश रानालाई शनिबार बिहान प्रहरीले पक्राउ गरेको छ । प्रहरी चौकी फटैया समेतबाट खटिएको प्रहरीले सु.प.प्र ०१-०१२ प ७७७० नम्बरको मोटरसाइकलमा सवार उनलाई उक्त पदार्थ सहित फेला पारी पक्राउ गरेको हो ।
तेह्रथुम, लालीगुराँस नगरपालिका-४ बाट नियन्त्रित लागूऔषध ट्रामाडोल ३८ ट्याब्लेट र डिकोलक ३८ ट्याब्लेट सहित धनकुटा महालक्ष्मी नगरपालिका-१ भण्डारी टोल बस्ने तेह्रथुम लालीगुराँस नगरपालिका-२ घर भएका २९ वर्षीय सुजित भण्डारीलाई शनिबार बिहान प्रहरीले पक्राउ गरेको छ । अस्थायी प्रहरी पोष्ट चित्रेबाट खटिएको प्रहरीले उनलाई उक्त लागूऔषध सहित पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको छ ।