नेपाल सरकार मन्त्रिपरिषद्को २०८२ वैशाख १५ गतेको निर्णयअनुसार उहाँ नेपाल प्रहरीको प्रहरी अतिरिक्त महानिरीक्षक पदमा पदोन्नति हुनुभएको हो ।

          सुनसरी जिल्ला ईनरुवा न.पा. २ पुर्वटोल, कोशी प्रदेश, पिता विष्णु प्रसाद पोख्रेल र माता दुर्गा देवी पोख्रेलका माहिला सुपुत्रको रुपमा वि.सं. २०२६ भदौ १५ गते जन्मनु भएका प्रहरी अतिरिक्त महानिरीक्षक कृष्ण हरि शर्माका श्रीमती रूचि शर्मा पोखरेल, १ छोरी र १ छोरा हुनुहुन्छ । प्रहरी अतिरिक्त महानिरीक्षक शर्माले वि.सं. २०५२ कार्तिक २७ गते प्रहरी निरीक्षक पदबाट नेपाल प्रहरी सेवा प्रारम्भ गर्नुभएको हो । प्रहरी अतिरिक्त महानिरीक्षक शर्मा २०६४ श्रावण ०४ गते प्रहरी नायव उपरीक्षक, २०७२ फागुन २३ गते प्रहरी उपरीक्षक, २०७७ माघ ११ गते प्रहरी वरिष्ठ उपरीक्षक, २०८१ जेष्ठ १६ गते प्रहरी नायव महानिरीक्षक र २०८२ वैशाख १५ गते प्रहरी अतिरिक्त महानिरीक्षक पदमा पदोन्नति हुनुभएको  थियो ।
         
 व्यापार  प्रशासनमा स्नातकोत्तर (MBA) साथै कानुनमा स्नातक (LLB) समेत गर्नुभएका प्रहरी अतिरिक्त महानिरीक्षक शर्माले चीनबाट प्रहरी अधिकृतका लागी कानुन कार्यान्वयन तालिम, संयुक्त राज्य अमेरिकाबाट विपद् राहत, सुरक्षा र अनियमित बसाईँसराईमा सिभिल मिलिटरी समन्वय आन्तरिक द्वन्द्ध व्यवस्थापन तालिम, बेलायतबाट HMIC को आधारभुत तालिम तथा स्वदेशबाट सुचना संकलन, विश्लेषण तथा व्यवस्थापन, विशिष्ट व्यक्तिको सुरक्षा तालिम, ईन्भेस्टिगेटिभ ईन्टरभ्यू ट्रेनिङ कोर्ष, प्रशिक्षक प्रशिक्षण, ल अफ आर्म कन्फिलक्ट ईन्स्ट्रक्टर कोर्ष, सामुदायिक प्रहरी प्रशिक्षक प्रशिक्षण तालिम, अपराध अनुसन्धान तालिम लगायत विभिन्न ११ वटा राष्ट्रिय तथा अन्तर्राष्ट्रिय तालिम हासिल गर्नुभएको छ । प्रहरी अतिरिक्त महानिरीक्षक शर्मा गद्दी आरोहण रजत पदक, विरेन्द्र ऐश्वर्य सेवा पदक, सुप्रवल जनसेवा श्री (तृतीय), संयुक्त राष्‍ट्रसंघीय शान्ति स्थापनार्थ मिसन Kosovo,Liberia,Haiti समेत गरी तीन ओटा UN Peacekeeping Medal लगायतका विभूषणबाट विभूषित हुनुहुन्छ । यसैगरी उहाँले उत्कृष्ट व्यावसायिक कार्य सम्पादन गरेबापत ग्रेड थप तथा विभिन्न समयमा नगद पुरस्कार प्राप्त गर्नुको साथै विभिन्न प्रशंसापत्रद्वारा सम्मानित हुनुभएको छ ।
      
   अब्बल एवम् कुशल नेतृत्त्वदायी भूमिकामा रहने प्रहरी अतिरिक्त महानिरीक्षक शर्माले प्रहरी निरीक्षक हुँदा काठमाडौं, गोरखा,  सशस्‍त्र द्धन्दकालको समय रुकुममा स्ट्राईकिङ्ग, मोरङ, काभ्रेपलाञ्चोक, सिराहा, दैलेख, धनुषामा जिम्मेवारी निर्वाह गर्नुभएको थियो । प्रहरी नायव उपरीक्षक हुँदा अर्घाखाची, लमजुङ्ग, संखुवासभाको कमाण्ड गर्नुको साथै बाँके, सिराहा तथा मातहत युनिटमा खटिएर जिम्मेवारी पूरा गर्नुभएको थियो । प्रहरी उपरीक्षक भएपछि जिल्ला प्रहरी कार्यालय दाङ, बाग्लुङ, महानगरीय प्रहरी प्रहरा गण मुख्यालय सामाखुशी, सर्वोच्च अदालत समन्वय तथा सुरक्षा ईकाई रामशाहपथ, क्षेत्रीय ट्राफिक प्रहरी कार्यालय बुटवलमा कार्यालयको कमाण्ड गर्नुका साथै केन्द्रिय अनुसन्धान व्युरो महाराजगंज, मानव बेचविखन अनुसन्धान व्यूरो, प्रहरी प्रधान कार्यालय मानव अधिकार उल्लंघन अनुगमन ईकाईमा आफ्नो जिम्मेवारी कुशलतापूर्वक निर्वाह गर्नुभएको थियो । प्रहरी वरिष्ठ उपरीक्षक भएपछि नेपाल प्रहरी प्रदेश कार्यालय पोखरा, बागमती प्रदेश प्रहरी तालिम केन्द्र, दुधौली सिन्धुली, त्रिभुवन अन्तराष्ट्रिय विमानस्थल सुरक्षा कार्यालयमा कमाण्ड गर्नुका साथै नेपाल प्रहरी प्रधान कार्यालय अन्वेषण योजना तथा विकास निर्देशनालय, एवम् नेपाल प्रहरी प्रधान कार्यालय अ.अ. विभाग महिला बालबालिका तथा ज्येष्ठ नागरिक सेवा निर्देशनालयमा जिम्मेवारी निर्वाह गर्नुभएको थियो । प्रहरी नायव महानिरीक्षकमा उहाँले काठमाडौं उपत्यका प्रहरी कार्यालय रानीपोखरी र बागमती प्रदेश प्रहरी कार्यालयको कमाण्ड समेत गर्नुभएको थियो । 
        
 काम प्रति जिम्मेवार,अनुशासित र कर्तव्यनिष्ट छवि बनाउनु भएका उँहा प्रहरी सेवामा साहसी प्रहरी अधिकृतको रुपमा पहिचान बनाउनु भएको साथै आफ्नो विषयमा अडिक रहने र जनताको सेवामा सदैव तल्लीन रही निष्पक्ष रुपमा कार्य सम्पादन गर्नु भएको छ ।