महोत्तरी, बर्दिबास नगरपालिका-१४ बर्दिबासस्थित सडकबाट करिब ६ सय किलोग्राम गाँजा सहित २ जनालाई मंगलबार बिहान प्रहरीले पक्राउ गरेको छ । पक्राउ पर्नेहरूमा भारत मोतिहारी ग्राम पंचायत कुरिया बस्ने २५ वर्षीय गुडडु कुमार यादव र भारत मधुरापुर बस्ने २९ वर्षीय मनिष कुमार गिरी रहेका छन् । बाग्मती प्रदेश ०३-००१ ख २८३२ नम्बरको मिनि ट्रकमा गाँजा ल्याउँदै गरेको भन्ने सूचनाको आधारमा अस्थायी प्रहरी पोष्ट माईस्थानबाट खटिएको प्रहरीले उक्त ट्रकलाई जाँच गर्न खोज्दा नरोकी फरार भएपश्चात इलाका प्रहरी कार्यालय बर्दिवासबाट खटिएको प्रहरीले सोही ठाउँस्थित यामाहा स्वरूमको अगाडि उक्त फरार मिनिट्रकबाट वीआर २० जी ७०४३ नम्बरको ट्रकमा सामान सार्न लागेको अवस्थामा फेला पारी उनीहरूलाई पक्राउ गरेको हो । हाल फरार मिनि ट्रकको चालकको प्रहरीले खोजी गरिरहेको छ ।  

पर्सा, सखुवा प्रसौनी गाउँपालिका-५ सोलखपुरस्थित सडकबाट अवैध लागूऔषध गाँजा ५ किलोग्राम सहित २ जनालाई सोमबार दिउँसो प्रहरीले पक्राउ गरेको छ । पक्राउ पर्नेहरूमा पर्सागढी गाउँपालिका-७ बस्ने ३३ वर्षीय बालेश्वर प्रसाद यादव र ५५ वर्षीय देबेन्द्र यादव रहेका छन् । प्रहरी चौकी महुवनबाट खटिएको प्रहरीले पर्टेवा सुगौलीबाट महुवनतर्फ जाँदै गरेको ना.३८ प १८२५ नम्बरको मोटरसाइकलाई जाँच गर्ने क्रममा मोटरसाइकलमा सवार उनीहरूलाई उक्त परिमाणको गाँजा सहित पक्राउ गरेको हो । 

काठमाडौं महागरपालिका-३२ पेप्सीकोलाबाट अवैध लागूऔषध खैरो हेरोइन १६ ग्राम सहित २ जनालाई सोमबार साँझ प्रहरीले पक्राउ गरेको छ । पक्राउ पर्नेहरूमा सोही ठाउँ डेरा गरी बस्ने ईलाम देउमाई नगरपालिका-३ घर भएकी २८ वर्षीया सजिता राई र सिराहा मिर्चैया नगरपालिका-४ घर भएका २२ वर्षीय चन्दन कुमार साह रहेका छन् । लागूऔषध नियन्त्रण ब्यूरो कोटेश्‍वरबाट खटिएको प्रहरीले उनीहरूको डेरा कोठा तलासी गर्ने क्रममा उक्त परिमाणको लागूऔषध फेला पारी उनीहरूलाई पक्राउ गरेको हो । 

यस सम्बन्धमा प्रहरीले आवश्यक अनुसन्धान गरिरहेको छ ।